O sector lácteo prosegue as accións pola falta de acordos coa industria

O sector lácteo está quentando motores para as mobilizacións de calado que se prevén en maio. Os baixos prezos do leite e a ausencia de negociación entre industrias e produtores son as dúas principais reclamacións gandeiras. O Sindicato Labrego, Xóvenes Agricultores e Unións Agrarias escenificaron estes días a entrega dunha denuncia formal da situación ante a Xunta de Galicia. A axenda de accións das tres organizacións inclúe tamén esta semana reunións cos alcaldes de Soneira – Fisterra e Bergantiños, similares ás mantidas a pasada semana en Lugo. A Organización de Productores de Leche (OPL) tamén vén de amosar as súas críticas á actual situación a través dunha nota de prensa.

A reforma do paquete lácteo, culminada en marzo, semellaba ofrecer máis garantías para propiciar o entendemento entre industrias e gandeiros, pero na práctica, o mal endémico do sector, a falta de negociación entre as partes, continúa sen cambios. “Unha das ferramentas coa que a Administración pretendía dotar ó sector, as OPs (organizacións de produtores), demostraron novamente a súa falta de capacidade, xa que a industria non accede a negociar o leite con estas organizacións”, critican desde a Organización de Productores de Leche, unha entidade de ámbito estatal con forte presencia galega e que está autorizada para operar como OP nas negociacións coa industria.

Ante esta situación, a OPL considera que a unión das organizacións de produtores, pola que sempre se avogou desde a Administración, sería positiva, aínda que lonxe de emprenderse ese camiño, as perspectivas apuntan á aparición dalgunha organización de produtores a maiores das 8 xa existentes en España.

“A industria non accede a negociar prezos e contratos coas organizacións de produtores” (OPL)

“Chama a atención que desde os partidos políticos se promova a creación e se participe activamente no desenvolvemento de novas OPs que debilitarían aínda máis ó sector”, critica a Organización de Productores de Leche en nota de prensa. “Houbo reunións coa participación activa de representantes políticos en varios concellos nos que se ofreceu unha visión totalmente parcial e irreal da situación, facéndolle pensar ós gandeiros que as OPs teñen capacidade de negociación real”. Esta situación xa fora tamén criticada por Unións Agrarias.

A OPL, por último, tamén insta ó Ministerio de Agricultura a adoptar medidas contra a venda do leite a perdas na distribución comercial.

Reunións en Lugo
As tres organizacións agrarias maioritarias –Sindicato Labrego, Unións Agrarias y Xóvenes Agricultores- mantiveron o pasado xoves unha reunión en Lugo cos alcaldes da provincia, un encontro no que atoparon “unanimidade” e “coincidencia” por parte dos rexedores locais na análise dos problemas que afectan ó sector lácteo galego, así como na idea de que “a situación non pode continuar así”.

“A ameaza dalgunhas empresas de deixar a recollida non é máis que unha fórmula para xerar pánico” (Roberto García, Unións Agrarias)

O secretario xeral de Unións Agrarias, Roberto García, que participou na reunión, calificou de “esperpéntica” a ameaza dalgunhas industrias de de deixar de recoller a produción de cooperativas e gandeiros particulares. Desde o seu punto de vista, non é máis que unha “fórmula para xerar pánico” e que os gandeiros asinen os contratos a calquera prezo.

Os sindicatos esperan que os alcaldes esixan de Xunta e Goberno central actuacións con contundencia ante a industria e a distribución.

Moción da Deputación de Lugo
Na mesma liña, a vicepresidenta segunda da Deputación de Lugo, Lara Méndez, anunciou que o grupo provincial socialista defenderá no próximo pleno da institución provincial unha moción para instar ó Goberno a modificar a actual normativa que regula o sector lácteo, co obxectivo de “protexer ós produtores fronte a posibles abusos por parte da industria”.

Méndez fixo ese anuncio durante a reunión que mantivo cos responsables da Sat Os Foros, no municipio da Pastoriza, unha visita na que estivo acompañada polo deputado de Cooperación e Asistencia ós Concellos, Álvaro Santos, e polo alcalde pastoricense, Primitivo Iglesias.

Entre outras medidas, os socialistas pedirán que se inclúa a figura do mediador, así como que se apliquen “fortes sancións” para evitar prácticas abusivas por parte das industrias. Tamén demandan que se exerza un control sobre o uso do leite como produto reclamo nas grandes superficies e que se mellore a etiquetaxe dos envases para coñecer “o lugar de procedencia do leite”.

Información elaborada con aportacións de José Luis Ramudo (Lugo).