Un perfume que recolla a esencia da Ribeira Sacra

Recoller nun perfume o recendo dos viñedos e da vexetación da Ribeira Sacra. Esta é a idea que as biólogas Sol Zamuz Castro e Iria Rodríguez Vega veñen de concretar no proxecto “Recendo dunha terra milenaria”.

A iniciativa foi finalista no primeiro concurso de ideas empresariais organizado pola asociación Semente de Monforte, que se puxo en marcha o pasado ano. De momento buscan financiamento para o seu proxecto que xa despertou o interese do Consello Regulador da Denominación de Orixe Ribeira Sacra e dalgunhas empresas como Caurelor, con sede en Quiroga e dedicada á elaboración de marmeladas e conservas, e Ravetllat-Aromatics, unha empresa catalá especializada na elaboración e comercialización de perfumes.

A continuación achegamos un extracto da conferencia que ven de pronunciar Sol Zamuz no Centro do Viño da Ribeira Sacra baixo o título “Recendo da Ribeira Sacra: O interese dos compostos biosaudábeis”.

Na composición destes recursos vexetais interveñen numerosas substancias, entre as que destacaremos os compostos fenólicos, os compostos aromáticos e os aceites esenciais, por contribuír ás súas propiedades organolépticas –é dicir, á cor, ao sabor, ao olor, á textura- e definir o seu recendo propio; permiten coñecer a que hule a Ribeira Sacra.

Co noso proxecto pretendemos extraer estes compostos das mostras vexetais recollidas na contorna e identificar aqueles que van definir o recendo da Ribeira Sacra; a partir destes compostos elaborarase unha esencia que será a base para a fabricación de produtos de perfumería, cosmética e ambientación cunhas características definitorias da Ribeira Sacra, pero tamén mostos, meles, licores, aceites, marmeladas e outras conservas que non só terían estas características senón tamén propiedades beneficiosas para a saúde. En efecto, son ben coñecidas as propiedades dalgúns destes compostos coñecidos como bioactivos pola súa elevada actividade antioxidante.

Finalmente, aspiramos á creación da marca de calidade RECENDO DA RIBEIRA SACRA que ampararía non só a estes produtos, senón tamén a outros bens culturais producidos na zona, e que sería un excelente reclamo turístico.

Ademais, trataremos tamén de analizar aqueles subprodutos que, como o bagazo ou o alpechín, conteñen compostos de utilidade na industria farmacéutica, na alimentación ou na medicina. E pretendemos conseguir que moitas das empresas que elaboran hoxe na Ribeira Sacra, confíen no noso proxecto na busca de novas propiedades que permitan dotar de valor engadido aos seus produtos.

É dicir, que o noso proxecto ten dous enfoques ben diferenciados; por un banda, a busca dos compostos que van permitir crear a esencia base para a elaboración de novos produtos comerciais, e por outra, ofertar un servizo de análises bioquímicos e asesoramento para que as empresas agroalimentarias que xa están asentadas na Ribeira Sacra podan coñecer a composición dos seus produtos e levar a marca RECENDO DA RIBEIRA SACRA.

Ribeira Sacra

Pretendemos buscar sinerxías e colaboracións. Neste sentido, trataremos de implicar na difusión e comercialización dos produtos aos establecementos hostaleiros da zona, hoteis, casas de turismo rural, balnearios e outras infraestruturas turísticas como o Centro do Viño da Ribeira Sacra, os catamaráns, o tren turístico Aba Ribeira Sacra; e, por suposto, adegas e outras iniciativas comerciais da zona.

Sen dúbida, unha das principais oportunidades para o desenvolvemento do noso proxecto é a fortaleza do sector vitivinícola e o forte potencial turístico da Ribeira Sacra.

Pero nesta comarca existen outras iniciativas empresariais ligadas ao sector agroalimentario e a produción ecolóxica de meles, conservas, confeitos, cogomelos, aceites,… coas que tamén debemos buscar sinerxías. Nestes sentido, o apoio por parte de organismos públicos como o Consello Regulador da DO Ribeira Sacra, e por empresas tanto implantadas na zona (Caurelor) como foráneas (Ravetllat Aromatics SL), polas posibilidades que abre poñer no mercado novos produtos provistos dunha marca de calidade, é unha fortaleza importante.

Ademais, contamos co respaldo de tres grupos da investigación cunhas liñas de traballo enfocadas a extracción, separación e identificación de diferentes compostos en mostras agroalmientarias –entre outras- cos que contamos para levar a cabo a parte estritamente técnica do proxecto: Bioquímica da Vide (Misión Biolóxica de Galicia-CSIC), Química Analítica Alimentaria e Ambiental (Universidade de Vigo -Campus de Ourense) e Cromatografía e Quimiometría (Instituto de Investigación e Análise Alimentaria, Universidade de Santiago de Compostela).