A cooperativa subministráse a través de Larsa de 900 explotacións galegas, que non se benefician do diferencial positivo no prezo do leite que perciben os gandeiros asturianos
A conselleira de Medio Rural, María José Gómez, visitou esta mañá en Outeiro de Rei (Lugo) as instalacións de Larsa, unha industria galega propiedade da asturiana Capsa. No acto, a conselleira tivo ocasión de reunirse co presidente do Grupo Central Lechera Asturiana (Clas), Dámaso Alberto Álvarez, e co director xeral de Capsa, José Armando Tellado. A ambos pediulles que Clas lle dea entrada a granxas galegas como socias.
Neste sentido, María José Gómez aproveitou a súa presenza na factoría de Larsa para “reivindicar a necesidade de acortar ese diferencial de prezo que sempre hai entre o leite galego e o leite asturiano” e animou aos responsables de Central Lechera Asturiana a favorecer a entrada de gandeiros galegos como socios de pleno dereito da cooperativa.
“Eses gandeiros asturianos que perciben máis polo seu leite fano porque son socios da cooperativa e eu hoxe quero aquí invitar ao equipo directivo de Larsa a abrir as portas de Central Lechera aos gandeiros galegos. Ese é un reto de futuro pero eu penso que temos que apostar por permitir esa incorporación de gandeiros galegos a Central Lechera, o que vai ter un efecto inmediato de redución dese diferencial de prezo”, defendeu a conselleira.
Capsa recolle e procesa máis da metade do leite en Galicia, onde compra materia prima a 900 granxas, fronte a 800 que ten en Asturias
No 2010 Central Lechera Asturiana abriu momentaneamente a oportunidade de entrada a novos socios, pero a día de hoxe tan só 13 granxas socias están en Galicia (en municipios fronteirizos como Trabada) e 1 en Cantabria, mentres que o resto se atopan en Asturias.
Diferencial de 5 céntimos en litro
O prezo pagado aos gandeiros socios de Central Lechera Asturiana situouse de media en todo o 2023 un 6,59% por enriba do prezo medio de España, manténdose desta forma como a empresa láctea que mellor remunera aos seus socios gandeiros.
En Asturias CAPSA paga neste momento o leite aos socios da cooperativa 5 céntimos máis que aos gandeiros aos que lles recolle materia prima en Galicia grazas a un complemento ao prezo base (situado en 42 céntimos) denominado Reparto de Valor.
A maiores introdúcese un Pago por Trazabilidade que chega a 2,25 céntimos. Para cobralo é necesario cumprir cunha serie de obrigas, entre outras mercar o penso a ASA (a empresa de subministros de Central Lechera Asturiana), e facer uso doutros servizos como os carros mesturadores da ración, os servizos técnicos de nutrición, formar parte da ADSG veterinaria CLAS e do programa de calidade de leite da cooperativa.
As primas por cantidade calcúlanse en función das entregas realizadas na última campaña e van desde 0,5 céntimos a partir de 250.000 litros a 1 céntimo a partir de 500.000 litros ou 1,5 céntimos para as ganderías que entregasen máis dun millón de litros.
Os contratos actuais de Larsa en Galicia son a prezo fixo e van desescalando en función do tamaño da granxa
En Galicia, Larsa sempre mantivera un contrato para a compra do leite con dous prezos (un 70% a prezo fixo e un 30% vinculado ao prezo da manteiga) pero no contrato asinado no mes de abril deste ano pasouse o 100% a prezo fixo, cun prezo base de 42 céntimos que se mantén nos actuais contratos asinados o 1 de agosto.
Ao prezo base habería que sumar a prima de cantidade (ata 4,5 céntimos no caso das ganderías de maior volume), a prima por calidade hixiénico-sanitaria (a super A de Larsa é esixente, de menos de 25.000 xermes e 190.000 células e págase a 1,5 céntimos) e a prima de pastoreo (1,5 céntimos) no caso de granxas en extensivo.
As orixes da cooperativa Central Lechera Asturiana SAT remóntanse ao ano 1967, cando un grupo de gandeiros asturianos se uniron para comercializar e darlle valor ao leite que producían.
Hoxe, Corporación Alimentaria Peñasanta Sociedad Anónima (CAPSA), o motor industrial e comercial da cooperativa, é a maior industria láctea española. Capsa Food engloba tanto a marca Central Lechera Asturiana como a Larsa, ATO, Vega de Oro, Lácteas Flor de Burgos e Innova Food Ingredientes.
A presenza de Central Lechera Asturiana en Galicia vén de lonxe, pois antes de adquirir Larsa e as súas plantas de Outeiro de Rei e Vilagarcía de Arousa no ano 1997, fora propietaria do 49% de Leyma e tamén dunha queixería na comarca de Ferrol.
Dos 6.500 socios de Central Lechera Asturiana, tan só uns 800 entregan leite na actualidade
A aposta da cooperativa asturiana pola nosa comunidade reforzouse nos últimos anos, a medida que perdía capacidade de subministro de leite na súa rexión de orixe. Central Lechera Asturiana está a sufrir un goteo constante de peche de granxas (entre 8 e 10 ao mes) e prevé para este ano uns 160 abandonos, debido á elevada media de idade dos seus socios.
No 2016 Central Lechera Asturiana tiña 1.300 socios entregando leite; no 2020 eran xa 1.100 e neste momento non chegan aos 800. Segundo os datos facilitados na Asemblea Xeral de socios celebrada o pasado mes de xuño, a cooperativa contaba con 6.594 socios ao peche do exercicio 2023, dos que 825 eran abastecedores.
Entrada en Innolact
Trala saída no ano 2015 da francesa Bongrain do capital de Capsa, a empresa está controlada neste momento por Central Lechera Asturiana SAT nun 81,53%, correspondendo outro 10,9% a Caja Rural de Asturias, un 6,87% a Liberbank e un 0,7% a outros socios minoritarios.
A facturación do Grupo Central Lechera Asturiana SAT, que integra as firmas Capsa, ASA, Aseagro, CLAS Gestión e Biogastur, incrementouse un 8,4% o ano pasado, superando os 1.054 millóns de euros, obtendo un beneficio neto de 26,3 millóns de euros.
Queremos construir xuntos desde Galicia un futuro atractivo, rendible e sostible para o sector lácteo (José Armando Tellado)
Tralo recente desembarco en Innolact da cooperativa asturiana, este mércores desde a planta de Larsa en Outeiro de Rei José Armando Tellado quixo amosar o “firme compromiso de Capsa con Galicia” e polo “crecemento nacional e internacional desde esta comunidade”. “A nosa vontade, como se puido comprobar coa nosa operación recente de incorporación a Innolact é seguir construíndo futuro desde a compra e a transformación da materia prima nesta comunidade. Cremos que o futuro do sector lácteo está na cornisa cantábrica, con especial foco cara Galicia”, recoñeceu.
O último movemento industrial de Central Lechera Asturiana en Galicia a través de Capsa foi a adquisición do 40% da empresa Innolact SL, que produce distintos tipos de queixo de untar en Castro de Rei baixo a marca Quescrem. A empresa, especializada en queixo crema e mascarpone, vén de completar unha importante ampliación das súas instalacións no polígono industrial de Castro Riberas de Lea que lle van permitir duplicar a súa produción, do mesmo xeito que Larsa tamén renovou por completo nos últimos anos a súa planta de Outeiro de Rei, con novas liñas de envasado que lle permitiron facer fronte ao incremento de demanda como consecuencia do acordo con Mercadona para comezar a envasar leite de marca branca Hacendado.
Axudas para a transformación e comercialización
Neste contexto, a conselleira do Medio Rural puxo de relevo as axudas do seu departamento destinadas especificamente á industria agroalimentaria. Estas achegas para o fomento da transformación e a comercialización dos seus produtos beneficiaron dende o ano 2016 un total de 552 proxectos empresariais, que recibiron subvencións por importe global de preto de 172 millóns de euros.
A Xunta publicará este xoves no DOG o nome dos proxectos beneficiarios das axudas para transformación industrial deste ano
Cómpre salientar que unha parte moi destacada dos beneficiarios destas axudas corresponden ao sector leiteiro e, de feito, a resolución das mesmas deste ano, que beneficiarán 62 proxectos, sairá publicada no DOG este mesmo xoves, tal e como adiantou. “Galicia é o futuro do sector lácteo español e temos que gañar valor engadido a través da transformación do leite aquí”, defendeu María José Gómez.
Un momento de la visita a Larsa.
Situación do mercado lácteo
En relación coa situación do mercado lácteo, a conselleira de Medio Rural, María José Gómez, insistiu hoxe na necesidade de manter a estabilidade nos prezos do leite que perciben os gandeiros e volveu chamar a todos os axentes a esforzarse nesta liña de traballo conxunto, que -dixo- repercute de xeito positivo en todo o sector.
Gómez puxo hoxe en valor a aposta das industrias polo leite galego “como produto de extraordinaria calidade”, así como pola transformación do mesmo. Durante a visita a Larsa, a titular de Medio Rural destacou que a posición de liderado nacional de Galicia en produción favorece que a nosa terra sexa lugar de importantes investimentos por parte de destacadas empresas do sector.
Gómez salientou o papel de Larsa como un dos principais primeiros compradores de leite en Galicia, onde traballa con máis de 900 explotacións da comunidade. Nesta liña, a conselleira sinalou ademais o compromiso desta firma pola transformación e por dotar de valor engadido ao leite galego, en liña cos obxectivos da Estratexia de dinamización do sector impulsada pola Xunta en colaboración cos distintos axentes involucrados.
Durante a visita, a conselleira estivo acompañada polo director xeral de Gandaría, José Balseiros, e polo alcalde de Outeiro de Rei, José Pardo Lombao.
De Heus Nutrición Animal lanza Dairy Compass, unha solución tecnolóxica avanzada que analiza e monitoriza, en tempo real, os datos clave das…
Qué tristeza de goberno galego.
Em vez de promover un grupo lácteo galego…