O Consello Agrario Galego avaliará distintas propostas de cara a garantir máis fondos para a agricultura ecolóxica na PAC do período 2023-2027 e que non se volva repetir a situación da convocatoria 2022, na que a insuficiente dotación de fondos por parte da Xunta para as axudas de agricultura ecolóxica deixou fóra dos apoios a un 55% das explotacións solicitantes.
Así o explicou o conselleiro do Medio Rural, José González, tras presidir a xuntanza deste órgano colexiado, que tivo lugar hoxe en Santiago. O conselleiro sinalou que nesta reunión deuse aos representantes do sector agrogandeiro galego esta semana e a que vén de prazo para presentar propostas con esta finalidade.
Así, José González sinalou que se acordou coas organizacións profesionais agrarias e co Consello Regulador da Agricultura Ecolóxica de Galicia (Craega) traballar conxuntamente “para ter os datos o máis afinados posible” en canto ás hectáreas declaradas en ecolóxico. O obxectivo, trasladou, é “fixar os criterios que permitan dotar cun colchón orzamentario suficiente para poder atender todas as solicitudes que se presenten na orde que se publique neste 2023”, mediante a preceptiva modificación do Plan Estratéxico da PAC (PEPAC). Esta orde, subliñou o conselleiro, ten un período de permanencia de cinco anos, polo que “cómpre garantir fondos suficientes para cubrilo”.
Esta cuestión -a modificación do PEPAC- ten que ser debatida e aprobada polo Comité de seguimento deste plan, no que están presentes as organizacións agrarias con representación no Consello Agrario. Isto, como paso previo á tramitación dos cambios que deben ser aprobados, en última instancia, pola Comisión Europea.
O titular de Medio Rural remarcou que esta proposta sería para incrementar os fondos destinados ás axudas á produción ecolóxica para o período de cinco anos que comeza neste mesmo ano 2023. As axudas do ano pasado só esixían a permanencia do perceptor en ecolóxico para 2022, mentres que a convocatoria deste ano suporá un compromiso de permanencia na actividade durante cinco anos, para garantir a consolidación do ecolóxico e a maior cantidade de produtos deste tipo a disposición do consumidor.
En canto á exclusión do 55% dos solicitantes de axudas para ecolóxico nesta última convocatoria, o conselleiro argumento que no 2022 a suba do orzamento para estas axudas foi do 60 % respecto do ano 2021, polo que -aseverou- “todos, tanto o sector como a Xunta, entendemos que había orzamento suficiente”. José Gonzálz cualificou como “puntual” o ocorrido no 2022, “un tema derivado dun incremento extraordinario de superficie” e agora, concluíu, “imos reforzar os orzamentos para que isto non aconteza nos anos 2023 e seguintes”.
Roberto García, secretario xeral de Unións Agrarias, unha das entidades en representación dos produtores, defende que para a explotacións que quedaron excluídas “a Xunta estableza unha compensación pola súa falta de previsión; é a única solución que podería haber xa que o PEPAC xa está rematado”.
En canto aos criterios a establecer para que a solicitudes de axudas para os produtores en ecolóxico teñan fondos suficientes de cara al novo periodo da PAC 2023-2027, Roberto García subliña que “se deben establecer novos límites para que esta axudas vaian realmente para os produtores en ecolóxico e non para os especuladores, e iso é o que se vai acordar no Consello Agrario Galego”.
A modo de exemplo, explicou que “en ecoloxico non hai un límite de 60.000 euros de axuda por perceptor, como si existe en convencional” e que “polo menos 3 dos perceptores de axudas en ecolóxico en Galicia dispoñen de máis de 1000 hectáreas de terreo nas solicitudes”.
De Heus Nutrición Animal lanza Dairy Compass, unha solución tecnolóxica avanzada que analiza e monitoriza, en tempo real, os datos clave das…
Deixa unha resposta