Recomendan respetar as doses e os prazos nos tratamentos contra o mildio na viña

A Estación Fitopatolóxica de Areeiro, centro dependente da Deputación de Pontevedra, emitiu este xoves o seu aviso fitosanitario, no que aconsella respetar as doses e os prazos nos tratamentos contra o mildeu no viñedo, unha patoloxía que debería remitir nos próximos días coa previsión de baixada das temperaturas.

Velaquí a situación fitosanitaria nos viñedos da provincia de Pontevedra:

Mildio: 

Os técnicos de Areeiro informan de que “nas viñas tratadas da nosa rede e noutras moitas que imos revisando nos traxectos, observamos diferentes situacións, pero a maioría delas teñen aparentemente controladas as infeccións, e todo o máis apareceu algunha mancha moi dispersa na vexetación máis tenra”.

Non obstante, recoñecen que nalgunhas aínda se observa frutificación viable nalgúns acios e tamén nas follas, e noutras hai unha elevada proporción de acios afectados (superior ao 50% dos mesmos). “É normal debido á continuidade das contaminacións derivada dunhas condicións extremadamente favorables ao patóxeno, con noites cálidas e elevada humidade, e non sempre aos tratamentos”, recoñecen dende a Estación de Areeiro.

Neste sentido, a recomendación dos técnicos da Estación de Areeiro é a revisión constante das viñas para poder actuar a tempo de frear as infeccións no caso de que continúe a aparición de síntomas.

En canto ás previsións para os próximos días, informan de que “as diferentes axencias meteorolóxicas consultadas, o risco de infección debería ser menor nos días inmediatos debido ao descenso nas temperaturas mínimas e aos ventos de dirección dominante norte ou nordés, pero para a segunda metade da semana anuncian (a día de hoxe) novas precipitacións e subida de temperaturas mínimas, o que, de producirse, elevaría novamente o nivel de risco”.

Ademais, os técnicos lembran que “neste ano cobra aínda maior importancia, facer unhas aplicacións coidadosas, de calidade, e non superar as doses máximas das etiquetas nin aplicar volumes de caldo extremos, pois pode obterse precisamente o efecto contrario ao perseguido”. Asemade, insisten na necesidade de controlar a vexetación, tanto das vides como da herba para que o funxicida penetre de forma idónea na vide.

Oídio: 

Polo que respecta ao oídio, dende a Estación Fitopatolóxica de Areeiro informan de que de momento non detectaron síntomas, pero subliñan que “estamos nunha etapa na que a uva é moi sensible, polo que o nivel de alerta debe ser máximo”.

Black-rot: 

Unicamente apreciaron evolución na presenza de síntomas en follas nunha viña abandonada da comarca do Condado, non así nas demais, tratadas ou testemuña sen tratamentos. “As condicións previstas a corto prazo non serán tampouco especialmente sensibles á enfermidade, aínda que por fenoloxía da uva si hai risco”, precisan.

Botrite: 

Malia ter habido algúns días condicións de temperatura e de humidade favorables a este fungo oportunista, nin nos restos non desprendidos das flores, nin nos órganos necrosados polo mildio os técnicos da Estación de Areeiro detectaron o micelio do patóxeno.

Polo demais, informan, de que “as previsións climatolóxicas para os próximos días tampouco lle resultan favorables, polo que o risco será feble”.