New Holland iniciará a comercialización do T6 de metano a mediados do 2020

O tractor que circula co metano producido polas propias granxas xa deixou de ser un prototipo para convertirse nunha realidade no mercado, o T6 Methane Power, que sairá á venda na segunda metade do 2020, probablemente en torno ó mes de xullo, segundo desvelaron esta semana en FIMA Agrícola os responsables de New Holland. O fabricante europeo, que copa un 25% do negocio agrícola en España coas súas marcas New Holland, Case IH e Steyr, centra as súas estratexias de cara ó futuro na redución de emisións das súas máquinas, na dixitalización e na aposta polos servizos posventa.

O presidente de New Holland a nivel mundial, Carlo Lambro, puxo como exemplo do camiño da marca as novidades técnicas de New Holland premiadas en FIMA, como a accesibilidade de datos multiplataforma, unha solución adoptada por CNH Industrial, a matriz de New Holland, xunto con outras marcas punteiras do sector, como Claas e John Deere. “O noso obxectivo é ser a marca de agricultura máis aberta e mellor conectada”, subliñou Lambro.

Empacadora Big Baler HD.

En Zaragoza, New Holland presentou unha oferta na que destacou o T6 Methane Power, emblema dos combustibles alternativos; e outras tres máquinas: a empacadora Big Baler HD, coa que a marca declara buscar a “excelencia” na recolección de forraxes; o tractor T5 Dynamic Command, unha gama media polivalente recomendada para explotacións gandeiras e que destaca pola súa transmisión; e por último o tractor T4 FNV, enfocado a cultivos especiais coma os froiteiros.

Sobre o tractor T6 Methane Power, que iniciará a súa comercialización a mediados de ano, a marca ten boas previsións no curto prazo para mercados como o alemán, onde están moi extendidas nas explotacións as plantas de biogas, que xeran metano a partir dos residuos gandeiros e de biomasa.

Sean Lennon, vicepresidente da marca para Europa, e Carlo Lambro.

Para España, as previsións son tamén positivas, se ben é probable que o tractor T6 Methane Power gañe peso de cara ó futuro, cando se extenda máis no país a produción de biogas nas granxas. “Estamos tendo reunións con empresas de servizos e profesionais do sector e hai moito interese”, valora a marca.

Balance 2019 e retos 2020 en España
O director xeral de New Holland para España, Riccardo Angelini, fixo en FIMA un repaso polo balance da marca no 2019 e polas perspectivas para o 2020. En canto ó balance, en tractores New Holland situouse en España na segunda posición en cota de mercado, sendo a primeira marca en tractores especiais, cunha cota do 21%, e a segunda en tractores de alta potencia (13,7%) e en gama media (17,9%).

En colleitadoras, a marca ocupou tamén a segunda posición, cun 27,5% de cota de mercado; en tanto en empacadoras xigantes foi a marca líder, cun 37% das vendas. En rotoempacadoras, ocupou a cuarta posición, cun 11%, e en vendimiadoras de viñedo e olivar liderou o mercado, cun case monopolio total en olivar.

De cara ó 2020, a marca prevé un mercado estable no que buscará prestar especial atención ás demandas dos distintos sectores, que teñen en común puntos como a esixencia de rapidez no servizo, profesonalidade, implantación de novas tecnoloxías e conectividade.

En apeiros, a marca continúa consolidando a súa liña de apeiros propios (arados, segadoras, hileradoras, etc.) en colaboración coa súa cadea de concesionarios. “Temos unha integración cada vez maior. O noso obxectivo é que a nosa liña de apeiros represente un 30% das vendas de apeiros dos nosos concesionarios”, sinalou Angelini, que incidiu en que tódolos seus concesionarios manteñen libertade para continuar traballando con outras marcas de apeiros.