Megaro Foods reabre a sala de despece de Castro de Rei con vacún maior e ovino

A sala de despece que ocupara a extinta Artesanos Gallegos de la Carne volveu á actividade esta semana da man de Megaro Foods, a firma catalana que adquiriu a instalación na subasta concursal por 1,6 millóns de euros. Esta primeira semana de reapertura foi de adaptación do persoal, 25 traballadores, e de inicio dos traballos de procesado da carne, coa perspectiva de ir collendo rodaxe para xestionar en breve unhas 300 toneladas mensuais, a metade de vacún e outra metade de ovino.

O traballo da planta iniciouse con vacún maior e ovino, se ben a industria mantén tamén contactos con cadeas de distribución para recuperar a liña de fileteado de Ternera Gallega en bandexas, na que estaba especializada a sala de despece de Castro de Ribeiras de Lea. Polo de agora, Megaro Foods traballa con vacún maior, tanto frisón como de razas cárnicas, e con ovino que trae de Extremadura, con perspectivas en gran medida na exportación a países árabes e á área do Caribe.

Nos últimos meses, a empresa acometeu a ampliación do túnel de conxelación da planta, así como a creación dunha cámara de conservación de produto conxelado con capacidade para 600 toneladas. Esas obras, xa culminadas, oriéntanse principalmente a servir ós mercados estranxeiros, en tanto para o mercado estatal tamén traballará con produto en fresco.

Colaboración cos gandeiros
O xerente de Megaro Foods, Carlos Cebrián, subliña que a filosofía da empresa sitúase en aportarlle “valor engadido” ós gandeiros. “Non queremos ser uns simples intermediarios. Queremos ser unha empresa de servizos desde ó gandeiro ó consumidor. A nosa idea é favorecer un valor engadido para o gandeiro polo seu traballo e tamén ofrecerlle ó consumidor un prezo competitivo”, destaca Cebrián.

“Queremos aportarlle un valor engadido ó gandeiro e un prezo competitivo ó consumidor” (Carlos Cebrián)

Preguntado por posibles acordos de suministro con cooperativas ou grupos de gandeiros en Galicia, o xerente de Megaro Foods sinala que se atopa na fase de establecer contactos e relacións. “Estamos traballando desde a serenidade e a tranquilidade. O noso traballo non consiste nun ‘sprint’ senón nunha carreira de fondo. Co tempo, queremos estar máis próximos ó gandeiro”, valora.

En canto á posibilidade de traballar tamén con ovino galego na planta -actualmente mércao en Extremadura-, Cebrián sinala que está aberto á colaboración cos produtores galegos. En Galicia, o sector ovino está enfocado á cría de cordeiros e cabritos de calidade, orientados a mercados de proximidade, co caso paradigmático do selo ‘Pastores de Galicia’, promovido por Ovica, pero a planta de Castro de Rei representa tamén unha opción para canalizar as ovellas de desvelle.

Na actualidade, tratantes e carniceiros procesan parte das ovellas de desvelle de Galicia en Castilla y León pola falta de matadoiros galegos con autorización para procesar os Materiais Específicos de Risco (MER) do ovino de desvelle.