Asturias prevé autorizar a plantación de eucalipto nitens

O eucalipto nitens, unha especie máis adaptada á altitude e ós fríos invernais que o eucalipto globulus, estaba ata o de agora prohibida en Asturias, pero o Goberno da comunidade veciña proxecta autorizala proximamente. Así figura no borrador do Proxecto de Ordenación de Recursos Forestais presentado onte e que recibiu xa a oposición dos ecoloxistas, que se opoñen a esa autorización.

Os ecoloxistas lembran que o eucalipto en Asturias estaba limitado a plantacións na rasa costeira, a mellor zona para o eucalipto globulus, que atopa dificultades en altitudes superiores a 300 metros. Coa autorización do nitens, o eucalipto convertiríase nunha especie apta para boa parte do territorio, coa excepción da gran montaña e das restriccións en espazos naturais protexidos.

A autorización do eucalipto nitens era unha reivindicacións dos propietarios forestais asturianos, que ademais nos últimos anos están vendo como nalgunhas zonas as masas de piñeiro insigne se están a ver seriamente afectadas polos fungos da banda marrón e vermella.

En total, a previsión de Asturias é que cada ano se planten 300 novas hectáreas de eucalipto. De xeito paralelo á autorización do eucalipto nitens, o Goberno asturiano anunciou plans específicos para potenciar o castiñeiro e o carballo. O conselleiro de Medio Rural, Alejandro Calvo, apuntou que o Proxecto de Ordenación de Recursos Forestais busca crear emprego no rural, aproveitar novos nichos de negocio e fixar poboación.

En Galicia, a plantación do eucalipto nitens estaba agora permitida en todo o territorio, a excepción de espazos naturais protexidos, pero coa entrada en vigor da moratoria a novas plantacións de eucalipto, só se poderá plantar en parcelas que xa están ocupadas na actualidade por eucalipto.