O GDR-4, que xestiona os municipios de Castroverde, Friol, Outeiro de Rei, Guntín, Rábade, O Corgo e a zona rural de Lugo, aproba as subvencións da última convocatoria Leader prevista para este período 2021-2022 executando o 100% do orzamento asignado
Un momento da Xunta Directiva do GDR-4 na que se aprobaron os proxectos da última convocatoria
O Grupo de Desenvolvemento Rural Comarca de Lugo aprobou na súa última Xunta Directiva as axudas solicitadas polas persoas empresarias, emprendedoras, asociacións e entidades locais que presentaron as súas solicitudes en 2021-2022 dentro das zonas rurais Leader que xestiona: os municipios de Castroverde, Friol, Outeiro de Rei, Guntín, Rábade, O Corgo e a zona rural de Lugo.
Segundo explica o presidente do GDR-4 Comarca de Lugo, o Alcalde de Friol, José Ángel Santos, en total aprobáronse axudas por un importe de 470.124,84 euros, todas elas destinadas a loitar contra o despoboamento e conseguir a dinamización de zonas rurais, que son dous dos principais obxectivos deste grupo operativo.
Loitar contra o despoboamento e lograr a dinamización das zonas rurais son dous dos principais obxectivos
Estas subvencións van do 50% ao 90% a fondo perdido do orzamento total elexible de cada proxecto. Estas axudas, tramitadas e xestionadas polo GDR, están financiadas nun 75% polo FEADER (Fondo Europeo Agrario de Desenvolvemento Rural); un 2,5% polo Ministerio de Agricultura Pesca e Alimentación; e un 2,5% pola Axencia Galega de Desenvolvemento Rural (AGADER), dependente da Xunta de Galicia.
Na convocatoria 2021-2022 (última ata o momento deste período) disponse dun orzamento equivalente ao das axudas concedidas, unha cifra totalmente insuficiente para o montante de proxectos solicitados a través do GDR Comarca de Lugo, evidencian.
A Asociación para o Desenvolvemento Rural da Comarca de Lugo, constituída o 3 de xuño de 2016, busca fomentar o desenvolvemento rural no seu territorio como promotora de todo tipo de proxectos. Ademais, ao estar constituída como Grupo de Desenvolvemento Rural (GDR-4), tamén é o axente encargado de xestionar os fondos LEADER no seu territorio, conxuntamente coa Axencia Galega de Desenvolvemento Rural (AGADER), dependente da Xunta de Galicia.
Os investimentos en dinamización rural desde a creación do GDR-4 Comarca de Lugo ascenden a 3.048.179,73 €, sendo algúns exemplos destacados de proxectos realizados durante estes anos a Casa da Galbana, Hotel Cultural con Encanto; a clínica Mourin Saúde; o Punto de Atención á Infancia (PAI) do Corgo; ou as Xornadas do Cidadán Dixital; entre outros.
Cursos de formación e iniciativas de sensibilización social
Ademais de investimentos en proxectos produtivos e non produtivos, este ano desde o GDR-4 organizaron unha serie de actividades formativas coa colaboración da AGACAL, tales como inseminación de gando bovino; curso de aplicador de produtos fitosanitarios; transporte no benestar animal; iniciación e mellora da gandería de vacún de carne; e iniciación e mellora da gandería de ovino/caprino.
Con independencia do plan Leader, o GDR-4 participa en iniciativas tanto a nivel galego como a nivel estatal, estando adherido á Rede de Normalización Lingüística da Secretaría Xeral de Política Lingüística, e estando tamén involucrado na loita contra a violencia de xénero, organizando talleres e actividades para axudar a identificar situacións deste tipo no ámbito rural.
Hotel Cultural con Encanto Casa da Galbana
Clínica Mourín Salud
Punto de Atención á Infancia do Corgo
Xornadas de formación Cidadán Dixital
De Heus Nutrición Animal lanza Dairy Compass, unha solución tecnolóxica avanzada que analiza e monitoriza, en tempo real, os datos clave das…
Deixa unha resposta