Agrícola Noroeste estrea centro en Santa Comba, con aposta polo agrotech

Agrícola Noroeste asentouse en Santa Comba hai algo máis dunha década, cun equipo inicial de 2 técnicos e unhas instalacións que co paso dos anos quedáranse pequenas. O crecemento que experimentou levou á empresa a abrir agora un novo centro, que conta con máis dunha hectárea de superficie total e un equipo de 12 persoas, encargadas da atención posvenda, vendas e repostos.

Destaca tamén a incorporación dun técnico en agricultura de precisión, unha das apostas de Agrícola Noroeste. A empresa vén de inaugurar este mes o seu novo centro de Santa Comba cunhas xornadas de agricultura de precisión, nas que durante dous días explicoulle ós seus clientes as posibilidades do mundo agrotech.

Xunto con sesións teóricas, organizáronse demostracións de guiado automático do tractor, con media volta no cabeceiro, de aplicación de fitosanitarios con dron e de lastrado ventral dun tractor.

Equipo de Agrícola Noroeste en Santa Comba.

A xerente de Agrícola Noroeste, María Velasco, subliñou no acto o papel pioneiro de John Deere e da propia Agrícola Noroeste na agricultura de precisión. “Agora mesmo temos 8 técnicos no departamento de agricultura de precisión, para darlle resposta ás necesidades que nos demanda o sector”, explicou.

Nesa liña, Velasco referiuse á comarca de Santa Comba como “un referente no sector lácteo” que pode contar xa cunha maior atención e máis especializada en cada área de traballo.

Nas xornadas de agricultura de precisión de Santa Comba interviu tamén o director comercial de John Deere, Eduardo Martínez de Ubago, que incidiu en como a tecnoloxía pode ser a solución para tres grandes problemas do agro: as regulacións cada vez máis esixentes, os custos de produción e a falta de man de obra.

Agricultura de precisión, unha tendencia crecente no agro

O responsable de agricultura de precisión en Agrícola Noroeste, Mario Pellitero, expuxo nas xornadas de Santa Comba as claves da agricultura de precisión e as vantaxes que pode aportar nos traballos agrícolas.

• Beneficios xerais. A agricultura de precisión proporciona un aforro de consumos, tempos e un operador máis descansado, grazas á automatización da dirección, con guiado GPS.
• Apoio en todas as fases do ciclo produtivo.
• Mellora a preparación do terreo, evitando duplicidades de traballo ou omisións.
• Facilita a mellor distribución de insumos (fertilizantes, xurro e fitosanitarios). Por exemplo, a tecnoloxía NIR, incorporada ás cubas de xurro, permite medir en tempo real o nitróxeno aplicado, adaptando os volumes de saída de xurro.
• A partir de mapas de rendemento das colleitas, é posible preparar prescripcións á carta para a aplicación de fertilizantes nas distintas parcelas e seccións de cada finca.

• Asistencia en remoto. Poden enviarse e recibirse datos de xeito automático, o que facilita a conexión coa propia explotación e taller, que ten acceso directo ós datos de telemetría. “Con iso logramos que se reduza o tempo en que unha máquina poida quedar parada en campaña”, subliña Mario.
  
  O operario pode ademais recibir asistencia en remoto do taller para a configuración de apeiros ou solución de problemas puntuais. “É un aforro de tempo, pois en 2 minutos pode quedar resolta calquera cuestión de configuración”, destaca.
• Formación. Agrícola Noroeste ofrécelle formación ós agricultores para lograr que lle saquen o máximo rendemento á tecnoloxía e saiban como implementala do xeito máis eficiente.


Un dos momentos da inauguración do centro de Santa Comba.