Recomendacións para o coidado do viñedo durante os próximos días

A Estación Fitopatolóxica de Areeiro, centro dependente da Deputación de Pontevedra, publica este venres un aviso no que fai un repaso pola situación fitosanitaria dos viñedos na provincia.

Mildeu:

Entre o mércores desta semana, en que a Estación de Areeiro publicou que atopara a primeira mancha de aceite en parcelas revisadas, e hoxe día 4, detectáronse síntomas (mancha ás veces con esporulación) tamén noutras fincas, aínda que esta circunstancia non é xeneralizada.

De feito, aseguran que hai fincas sen tratar (nin sequera fronte a excoriose) “totalmente carentes de enfermidade”. “É lóxico que sexa así -explican os técnicos-, pois as condicións ambientais non foron especialmente favorables: ventos moderados do norte que secan o ambiente ou temperaturas nocturnas baixas en xeral”.

Para os próximos días as diferentes axencias meteorolóxicas consultadas prevén tempo seco e un significativo ascenso térmico, condicións que non favorecen as infeccións. Non obstante, tamén é certo que anuncian suba de temperaturas nocturnas, compatibles coa esporulación do patóxeno sempre e cando se rexistre humidade suficiente, aínda que tampouco parece que o risco vaia alcanzar niveis elevados.

Por todos estes motivos, as recomendacións dos técnicos da Estación Fitopatolóxica de Areeiro son:

-En fincas que xa recibiron tratamento estes días, comprobar a eficacia da intervención, sobre todo considerando que algunhas destas aplicacións se fixeron en condicións de vento non recomendables para tratar e dispersaron o funxicida cara áreas fora do viñedo.

-En parcelas onde aínda non se detectaron síntomas da enfermidade, facer revisións para detectar a primeira mancha. Lembran que soen aparecer en zonas menos aireadas e nas follas máis baixas das varas, e que nestes momentos na viña hai algunhas descoloracions que non son manchas de mildeu. “Co nivel de risco esperado polas condicións meteorolóxicas previstas, agardar a detectar os síntomas é a mellor das opcións, sobre todo se a humidade relativa se mantén en niveis baixos de noite e non se produce esporulación”, recomendan.

Roturas polo vento:

Os ventos moderados que se rexistraron, así como a sarabia que houbo en algunhas localidades provocou rotura de gromos e follas nalgunhas fincas. A recomendación dos técnicos de Areeiro é que se as previsións meteorolóxicas se cumpren, seguramente estas feridas non teñan maior transcendencia. “Pero onde haxa unha presenza abundante de danos é aconsellable elixir funxicidas que leven folpet ou similar”, informan.

Oídio:

Micelio de oidio en folla de variedade tinta

Os técnicos de Areeiro informan de que non detectaron síntomas desta enfermidade en ningunha das parcelas visitadas, e mesmo tampouco na variedade tinta moi sensible onde solen encontralos. A súa recomendación é que de momento non é necesario empezar as intervencións con xofre ou outros antioídos.

Couzas do acio:

Se non o fixeron aínda, este é un bo momento para instalar as trampas de  feromonas sexuais destas bolboretas. En todo caso lembran que, aínda que teñan capturas nas trampas (de feito xa as hai), a primeira xeración non soe causar danos que xustifiquen un tratamento, e que en xeral as capturas nas trampas se utilizan para saber cando tratar, pero no para decidir se hai que facelo ou non, que depende dos síntomas.

Ácaros:

Só se ven illadamente síntomas de erinose, pero de momento o seu índice de aparición é moi inferior ao da anterior campaña. De acariose, que ás veces require tratamentos, en Areeiro non detectan presenza.

A este respecto, lembran que a sintomatoloxía que produce este último ácaro pode confundirse con outras alteracións ou con certas  fisiopatías, e que deben ser confirmados antes de aplicar un tratamento.