O encontro, que lle dá este ano protagonismo á cadea forestal – madeira de Francia, conta co arquitecto Christophe Ouhayoun, fundador do estudio KOZ, un dos que deseñou as infraestruturas de madeira dos Xogos Olímpicos de París
A Fundación Arume desenvolverá o próximo martes 29 de outubro a cuarta edición de ‘Piñeiros’, o encontro internacional especializado nas coníferas, que se desenvolverá na Cidade da Cultura (Edificio Fontán). Máis de 300 persoas xa se inscribiron para asistir presencialmente ó evento, que terá ademais difusión en streaming a través das redes sociais de Pino de Galicia e deste link.
Este ano, Piñeiros 24 contará cunha conferencia principal, a cargo do arquitecto Christophe Ouhayoun, fundador do estudio KOZ, un dos que liderou o deseño das infraestruturas de madeira dos Xogos Olímpicos de París.
A continuación, o programa confórmano tres mesas redondas que abordarán cuestións claves na cadea forestal – madeira, como son o papel da madeira na descarbonización e industrialización da construción, experiencias na xestión de montes e, en terceiro lugar, innovacións en usos e produtos complementarios que se extraen das coníferas.
Este ano, Francia será o país coprotagonista de Piñeiros 24, igual que en anos anteriores se lle prestara unha adicación similar a Portugal (Piñeiros 23) ou a Euskadi (Piñeiros 22). Francia, en especial a rexión de Nova Aquitania, é un dos referentes europeos no manexo do piñeiro do país (‘Pinus pinaster’), tanto a nivel forestal como industrial. En Piñeiros 24 contarase coa presenza de Xylofutur, o clúster de innovación do sector forestal – madeira do país veciño, e cunha serie de ponentes que explicarán a realidade da cadea monte – industria de coníferas en Francia.
‘Piñeiros24: foro de coñecemento entre Galicia e Nova Aquitania-Francia’ conta coa colaboración da Xunta de Galicia, a través de XERA Axencia Galega da Industria Forestal.
Programa final
08:45 Recepción e acreditación de asistentes.
09:30 Apertura.
10:00 Conferencia: A madeira, herdanza poética dos Xogos Olímpicos
Christophe Ouhayoun, arquitecto y fundador del estudio KOZ.
10:30 A madeira na descarbonización e industrialización da construción.
Modera: Teresa Táboas, vicepresidenta da Unión Internacional de Arquitectura.
12:00 Pausa café.
12:30 A xestión de montes: experiencias e perspectivas.
Modera: Asun Cámara, coordinadora de Juntos por los Bosques.
14:00 Pausa para refrixerio.
15:30 Innovando co piñeiro.
Modera: Juan Picos, profesor da Escola de Enxeñaría Forestal Campus Pontevedra, UVigo.
17:00 Peche. Representante institucional da Xunta de Galicia.
De Heus Nutrición Animal lanza Dairy Compass, unha solución tecnolóxica avanzada que analiza e monitoriza, en tempo real, os datos clave das…
Deixa unha resposta